1Pe 4 | GbrGAW | STEP | Shikonyi Kristi ɓei ku wahala sin wa dna n na zhin gye, fye ku wo bugba pya fi, fya ku zhi n shiriyi fya sin wahala ce. Ntuge fye pa ge, esa n nayi kwa sin wahala laifi kala kwa gba.

1 Peter 4

1 Shikonyi Kristi ɓei ku wahala sin wa dna n na zhin gye, fye ku wo bugba pya fi, fya ku zhi n shiriyi fya sin wahala ce. Ntuge fye pa ge, esa n nayi kwa sin wahala laifi kala kwa gba. 2 Fye ta shan asese fyei vi aɓepwawo nayi nyam, ama aɓa wo fye pwa ngye fye zhin Shekwoyi ɓeye nu. 3 Aɓo anukwoyi ye ku fye kun, n fye ɓei zhin fyei zhin n sapa, n na a tna Shekwoyi yekpei zhin ɓa dagma fi n ɓa nyi, ajesin ajeshin, shakpe, jesin, awye-fan kasa ngye a nyacei shangba, n na ɓenukwoi aje yi.

4 Ai ceɓa wo of ye nugundo kwokwoi, shi fye to ye-yelo fya zhin aɓo nukwoi n gnisun ɓai, shi fye ɓei zhin fyei shin zhin nyim, ntucenu, ɓa ɓa mafye san ɓai kpe fya gye. 5 Ama fye pa ge tilas ɓa zhi n Wadayi vinya abye, awye-wyeyi da n na zafi yi, aɓei taɓa ngye shi ɓa sase wu. 6 Ntucenu a zhin azafi Nabari Manayi waʼazi n nuwan ɓei wan ɓa nyi, ntuge koda-yake aɓei taɓa nayi n efiyi ɓa mi ɓa sase fi nɓa azafun ngye Shekwoyi.

Yeye Pui Alaifi Anya Nmwa.

7 Anyi zo ɓelo esa fyewyi, ntucenu fye lace, fya zhin aduwa nubo cici. 8 Nya kwo du vinya, fye gyi abye fyei wu aje ye-ye dnagmai ntuge yeye zhin kwa pui alaifi nya mwa begye. 9 Fye ye n najei, fyei gaza nyagyi n na gyewanba yi, nɓa filo n ʼsan ntna awyice.

10 Shekwoyi la aɓozhin-zhinyi ga zaho-zahoi n, fyemi, fye zhin apma ɓai, ntu naza bmazhin ɓo, fye ce Shekwoyi anabarka ga azaje nwo ga fye nyi. 11 Ala ho yi ha zhin waʼazi? To zhin waʼazi ngye Shekwoyi nu daɓo nho ʼgbe yi. Ayiho ha bma aza zhin nu? Zhin kwo n kalayi vinya n Shekwoyi wa gaho, n nabai a la Shekwoyi tu dna n Yesu Kristi, mwa-mwa n ikoyi owo nya nu har nyalonyalo. Amin.

12 Oma nugundo, ceto wofye fye ya sin wahala napyei n na bye deyen, ntuge oɓo woyi honu toye kwa bwa fyen. 13 Ama ada fye dada nu ntuge awahalaye ɓa ze fye gmanyi n Kristi yi dna n wo wahala, n na vun fye ɓei bwa agmada yakwo dna nwo latu n kwo ɓelo nyi.

14 Fye dagma n na kni fye akmi ai tu fye ʼkni she fye vi Yesu, ntuge n kwa bwa fye lonu Shekwoyi Zafun ɓa ɓe fye aba n mwa-mwa yakwoyi. 15 Fye to ye mawo fye wahala sin ɓo ntuge fya wu oza kwo fya wyi ʼvim, kwo ɓenukwoi zhin, kwo ge fye laɓa fyei fi azaɓo abwam. 16 Ama kwo to zhin vinyiko ɓonu oza sin wahala she wo vi Yesun, ci Shekwoyi she ho zhin Yesu nya nu, har ai yi ho n wo ʼye latu nya yi. 17 Ntuge esalasi wada nya, tilas kwa ya n Shekwoyi aɓiyi nu. Tunda aɓa da a Yesu viyi owa, aza n ɓa to ga Dagayi gaiciya nyi ma, a ɓei ka zozo nɓai wuna? 18 N na a-ɓe-fyece-zhin-yi a pwo deca, atna Shekwoyi-viyi nna ɓenukwoyi zhin yi ma, aɓei papa agye ɓa da ma?

19 Ntuce nu fye sin wahal a ntu Shekwoyi ɓeye zhin ɓo, gyi abye n ɓe-manai-zhin-yi, fya kpema Shekwoyi n wa zhin fye nyi, ntuge wota yafyen.